注意:標題及內文有點粗俗。
孫柏文《金手指》:有權鄭家富、窮人冚家富(2009-2-6)
好幾個月前,當股票日日跌到喊嘅時候,孫柏文因為見估值跌到吸引水平,就開始對啲心儀嘅公司進行更深入調查。亦因當時兵荒馬亂,我就更留意防守性強嘅公司。講到防守性強,就一定包括啲富有特區特色,喺「利潤保證計劃」下嘅公司。
因為當時商品,特別係油價亦大幅回落,我就將注意力集中喺用好多油、運輸類別嘅公司身上,最後選經營九巴嘅載通(062)。咁做功課呢樣嘢,過往數據上網已睇到,不過要估未來會點,就一定要廣納意見。而睇載通,就令我走去問一個將軍澳嘅區議員。
「鐵路優先」有玄機
區議員一聽到我問關於載通嘅嘢,劈頭第一句話:「諗你都唔好諗,立法會有個新界東議員,係又鐵路優先,唔係又鐵路優先。佢不但覺得人人應搭鐵路,仲非常仇恨巴士。」我問點解佢會咁憎巴士,區議員都話唔知,仲話佢連普通司機都憎,連最基本普通法疑點利益歸於被告,都要蹂躪。我聽完冇買。
輾轉幾個月後,我終於知到點解。原來呢個議員好鍾意飛車,以前仲曾經被釘牌。當全人類都「鐵路優先」,馬路冇車佢就有得飛車。佢特別憎巴士司機嘅原因,係因為太龜速,阻住佢飛車,所以力主鐵路優先,趕走啲龜巴!
不過奉勸大家,如果你被告超速,又唔係律師加立法會議員,唔出庭聆訊,你就係新界東立法會議員鄭家富口中「馬路上的計時炸彈」,疑點利益唔歸你,毋須審訊已定罪。
不過如果你係,只要出張新聞稿、道道歉,就會繼續享有基本普通法人權。
真係太似淫照事件。有權超速鄭家富、窮人超速冚家富。
我的意見:
現時的鐵路迷,部分亦是保鐵人士;他們的居心,又會否同孫柏文所說的,以保鐵為藉口,實情是滿足自己的權力慾?