隔牆有耳：刷走維基劣迹煲呔有辦法
最近美國有個黑客設計咗套「維基百科掃描器」（Wikiscanner），透過呢個程式，可以追查到邊啲機構編輯過維基百科，結果揭發美國CIA同FBI嘅電腦，都編輯過維基入面有關伊拉克戰爭嘅資料；澳洲政府嘅電腦，亦刪除過針對澳洲政府嘅負面內容。呢場維基編輯身份大曝光嘅風暴，近日居然吹到嚟香港，連煲呔、廉署、教育局同明光社都牽涉在內。
用東亞電腦修改內容
係人都知，任何人都可以修改同編輯維基百科嘅內容。《南華早報》噚日報道，用Wikiscanner追查後發現，舊年11月當袋巾展開參選特首攻勢之時，有人用廉記嘅電腦，喺英文版維基有關Donald Tsang嘅資料度，加入批評煲呔解決空氣污染問題不力嘅內容，話好多外國公司都因為香港空氣污染而撤走。八方噚日試過，發現真有其事。今年3月當煲呔嘅競選工程如火如荼之際，就有人用東亞銀行入面嘅電腦，多次編輯維基百科有關煲呔嘅內容，加入好多正面嘅評價，搞到十足個人宣傳咁。好似空氣污染呢一條，就特別加入咗煲呔搞藍天行動嘅豐功偉績。大家應該仲記得，東亞主席寶哥哥係煲呔競選辦主任，煲呔嘅競選辦亦係租用東亞嘅寫字樓。不過，八方噚日問過當日幫煲呔做競選辦公關主管嘅游淑儀，游小姐話據佢所知，競選辦冇編輯過維基百科有關煲呔嘅內容喎。咁又係嘅，東亞入面咁多人，話唔定另有煲呔支持者發功呢？至於廉記邊個咁大膽批評主子，又同曾經盛傳煲呔有意整頓廉署有冇關係，八方就不得而知喇。廉署嘅發言人就話，會研究吓究竟乜嘢事。其實除咗廉記部電腦俾人用嚟批評煲呔，教育局嘅電腦亦參與過編輯維基百科嘅工作，對象係明光社。
「教育局」批評明光社
大家都知，教育局嘅前身教統局將中小學教師嘅人權教育培訓課程判咗畀明光社搞，引起唔少爭議。今年5月，有人用教育局嘅電腦，編輯維基百科有關明光社嘅內容，形容明光社係一個hate group（鼓吹仇視某種族或社群嘅組織），仲話佢哋引起香港社會嘅道德恐慌。教育局發言人畀八方嘅官方回應係：局方唔會編輯其他機構嘅網頁內容，但會了解吓呢件事。咁會唔會係局入面有人認為明光社係道德塔利班，唔認同畀佢搞人權教育培訓呢呵？
---------------------------
FBI 同 CIA 件事都好耐之前 =.= 不過相信都好多人改既~
